Market Execution စျေးကွက်အကောင်အထည်ဖော်မှု

Forex မှာအရောင်းအဝယ်လုပ်တာ အော်ဒါတွေကို ကိုင်တွယ်ပြီး ဆောင်ရွက်ပေးတာကို Market Execution လို့ခေါ်ပါတယ်။ မားကတ်ထဲမှာ ကျွန်တော်တို့ တွေ့ဖူးပါလိမ့်မယ်။ Market Maker, STP, ECN စသဖြင့်ပေါ့။ ဒီ အသုံးအနှုန်းတွေက ဘာကို ဆိုလိုလည်း၊ တစ်ခုနဲ့တစ်ခုဘယ်လိုကွာခြားသလည်း၊ အကျိုးအပြစ်တွေက ဘာတွေလည်းဆိုတာ အနည်းအကျဉ်းရေးသားတင်ပြလိုက်ပါတယ်။

(၁) Market Maker (MM)

မားကတ်မှာ ကိုယ်တိုင်ဝင်ကစားသူလို့ဆိုနိုင်မလားပဲ။ ကိုယ်တိုင်ကစားတာဆိုတာက Broker ဘက်ကပြောတာပါ။ Clients တွေရဲ့ အော်ဒါတွေကို ကိုယ်တိုင်ကိုင်တွယ်ပြီး အလျော်အစားလုပ်တဲ့သဘောပေါ့။ ဒီ Market Maker တွေကို Dealing Desk (DD) လို့လည်းခေါ်ကြပါတယ်။ ဒီလို Market Maker အမျိုးအစားကို Artificial Type Broker တစ်မျိုးလို့ သတ်မှတ်ကြပြီး၊ Artificial ဆိုတာက made or produced by human beings၊ လူတွေနဲ့လုပ်တာကို ဆိုလိုတာပါ၊ ဒီအတွက် ဒီ MM တွေက မားကတ်ကို တိုက်ရိုက် ရောင်ပြန်မဟပ်ဘူးလို့ လည်းယူဆကြပါတယ်။ ဒါပေမယ့်.. သူတို့ Quotes လုပ်တဲ့ဈေးတွေကတော့ မားကတ်နဲ့ ကွာခြားမှုမရှိပါတယ်။ MM မှာ ကိုယ်ဝင်လိုက်တဲ့အော်ဒါဟာ သူတို့အတွင်းထဲမှာပဲ Dealing လုပ်ကြပြီး

မားကတ်ထဲကို တကယ်မထွက်သွားဘူးလို့ ဆိုပါတယ်။

အားသာချက်။ ။ Execution မြန်ဆန်ပြီး၊ ပုံမှန်အားဖြင့် ဈေးပြန်ပြင်တာမျိုး Re quotes မရှိပါဘူး။ (တစ်ချို့ကတော့ MM တွေက Requote ပိုလုပ်တယ်လို့ဆိုပါတယ်။)

အားနည်းချက်။ ။ ကိုယ်အမြတ်က Broker အိတ်ထဲကထွက်လာပြီး၊ ကိုယ့်အရှုံးက Broker အိပ်ကပ်ထဲရောက်သွားမှာပါ။

(မှတ်ချက်၊ ။ Market Maker မှာ အရောင်းအဝယ်မလုပ်သင့်ဘူးလို့ ဆိုလိုရင်းမဟုတ်ပါ။ MM တွေရဲ့ Dealing Desks မှာ Clients တစ်ဦးချင်းစီရဲ့ Trading Record တွေ၊ Performance Record တွေရှိပါတယ်။ ဒီအတွက် Trader တစ်ယောက်ဟာ အရှုံးများတဲ့မှတ်တမ်းရှိသူ၊ ပုံမှန်ရှုံးတတ်သူ၊ ရှုံးနိုင်ချေရှိတဲ့ သူဆိုရင် ယင်းရဲ့ အော်ဒါတွေက ဒီ MM ဆာဗာမှာပဲ ရပ်သွားမှာဖြစ်ပြီး၊ မားကတ်ထဲက အမြတ်တကယ်နေသော Record ရှိသူ၊ တကယ်မြတ်နိုင်ချေရှိသူများရဲ့ အော်ဒါများကတော့ MM မှဂိတ်မဆုံးပဲ မားကတ်ထဲကို ထွက်သွားနိုင်မှာဖြစ်ပါတယ်။ Broker တွေအပြိုင်အဆိုင်ကြားမှာ ဈေးနှုန်း (Quotes) တွေ၊ Gap တွေကို ကစားပြီး Clients ဆီက အမြဲညစ်ယူလို့ မဖြစ်နိုင်လို့ ဘယ်သူမှ (ဘယ် broker မှ) အမြဲမြတ်နေနိုင်တဲ့ အမြတ်ရနိုင်ချေရှိတဲ့ Trading activities ရှိသူများရဲ့ အော်ဒါတွေကို ကောက်စားမှာ မဟုတ်ဘဲ မားကတ်ထဲအထိ ပို့ပေးဖို့မယ့် လမ်းကြောင်းပေါ် တင်ပေးလိုက်ဖို့ များပါကြောင်း မှတ်ချက်ပြုအပ်ပါတယ်။)

(၂) Straight Through Processing (STP)

ဒီအမျိုးအစားမှာတော့ Broker ဟာ ကျွန်တော်တို့ရဲ့ အော်ဒါအားလုံး (သို့မဟုတ်) တစ်စိတ်တပိုင်းကို မားကတ်ထဲ တိုက်ရိုက်ထည့်ပေးလိုက်တာပါ။ အထက်က MM မှာ ကျွန်တော်တို့မှတ်ချက်ပြုခဲ့သလိုပါပဲ၊ သူတို့ကောက်စားလို့ အခြေအနေမကောင်းတဲ့ အော်ဒါတွေကို မားကတ်ထဲလွဲထည့်ပေးလိုက်တဲ့သဘောပါ။ ဒီစနစ်က MM နဲ့ ECN စနစ်တွေကို Modified လုပ်ထားတဲ့ စနစ်တစ်ခုလည်းဖြစ်ပါတယ်။ တစ်ချို့ Broker များဟာ Market Maker ပေမယ့် STP လို့ ရေးကြပြောကြတာရှိပါတယ်။ အများအားဖြင့် STP နဲ့ MM ကတွဲရက်ဖြစ်နေတတ်ပြီး၊ ရှုံးတဲ့သူတွေအတွက်က MM၊ မြတ်တဲ့သူတွေအတွက်က STP လို အလုပ်လုပ်ပါတယ်။ ( MM for losers and STP for winners)

အားသာချက်။ ။ MM လို Conflict မများဘူး။ ဈေးနှုန်းတွေကလည်း မှန်ကန်ပါတယ်။

အားနည်းချက်။ ။ requotes လုပ်တာတွေများတတ်လို့ execution လုပ်တဲ့အခါမှာ နှေးကွေးတတ်ပါတယ်။

(မှတ်ချက်။ ။ ဒီနေရာမှာ Re-Quotes လုပ်တယ်ဆိုတာကို အနည်းငယ်ပြောပြလိုပါတယ်။ Broker တွေအနေနဲ့ ကျွန်တော်တို့ ဝင်လိုက်တဲ့ (Instant Order) ဈေးနှုန်းအတိုင်း အော်ဒါပွင့်ဖို့ broker တွေဘက်က အကြောင်းကြောင်းကြောင့် နှေးကွေးမှုဖြစ်တဲ့အခါမှာ Re Quotes ဆိုတာဖြစ်လာပါတယ်။ ဒီအခြေအနေမျိုးမှာ ကျွန်တော်တို့ဝင်လိုက်တဲ့ ဈေးကတစ်မျိုး၊ တကယ်အော်ဒါပွင့်သွားတဲ့ဈေးကတစ်မျိုးဖြစ်နေတတ်ပါတယ်။ တအားလှုပ်ခတ်မှုများနေတဲ့ မားကတ်အခြေအနေမျိုးမှာ ဒီလို Requotes တွေကို ခဏခဏ ကြုံရနိုင်ပါတယ်။ အထူးသဖြင့် High Impace Data တွေ၊ News အခြေအနေမှာမျိုးမှာလည်းကောင်း၊ Broker ရဲ့ System စွမ်းရည်မပြည်တဲ့အခါမှာသော်လည်းကောင်း ဒီလိုအခြေအနေမျိုးကို ကြုံရနိုင်ပါတယ်။ တစ်ချို့ Platforms မှာတော့ တစ်ခါတရံ အဲလို Requote ဖြစ်မယ်ဆိုရင် ဒီဈေးနှုန်းကို လက်ခံနိုင်မနိုင်မေးတာမျိုးလည်း တွေ့နိုင်ပါတယ်။ “Please Wait” ဆိုတာပေါ်ရင်လည်း အဲဒါ Requotes ပေါ့။ လက်ခံ၊မခံကိုယ်က ဆုံးဖြတ်လို့ရမှာပါ။ ဒီလို Requotes အခြေအနေကို ကျွန်တော်တို့အားလုံးနီးပါး ကြုံဖူးနိုင်ပါတယ်။ အထူးသဖြင့် ဒေတာချိန်တွေမှာ ကိုယ်က Enter နှိပ်ပြီးပြီး အတော်ကြာမှာ Confirm ဖြစ်တာမျိုးပါ။ သေချာတယ် Requote နဲ့ ညားပြီးဆိုတာ။ ဒါဆို Requote ကို ဘယ်လိုရှောင်းရှားမလည်း လွယ်ပါတယ်။ Order တွေကို Instant မပေးဘဲ Pending အော်ဒါတွေပေးရင် Re quotes ကိုအလွယ်တကူကျော်လွားနိုင်မှာဖြစ်ပါတယ်။ Market Maker များဟာ သူ့ကိုယ်ပိုင် Dealing Desk နဲ့အလုပ်လုပ်လို့ Dealing Desk လို့ခေါ်ပြီး၊ STP နဲ့ ECN ကိုတော့ Non Dealing Desk ထဲမှာလည်း ထည့်ကြပါတယ်။ STP အစစ်ဆိုရင် Non Dealing Desk လို့မှတ်ပေါ့ဗျာ။)

(၃) Electronic Communications Network(ECN)

မားကတ်ကို Trader ကိုယ်တိုင် တိုက်ရိုက်ဝင်ရောက်နိုင်အောင် တနည်းအားဖြင့် ကျွန်တော်တို့ရဲ့ အော်ဒါတွေ မားကတ်ထဲကို ရောက်အောင် ကျွန်တော်တို့ကိုယ်တိုင် ပို့တဲ့ပုံစံဖြစ်ပါတယ်။ ကြားထဲက MM Server တွေ၊ STP တွေဖြတ်စရာမလိုတော့ပါဘူး။

အားသာချက်။ ။ မားကတ်ကိုတိုက်ရိုက်ရောက်မယ်။ ပုံမှန်အားဖြင့် Spread မှာထပ်ပေါင်းတာမျိုးမရှိ၊ trade လုပ်တာ လုံခြုံတယ်။  Maximum Floating နဲ့ Pending အော်ဒါတွေ ကန့်သတ်ချက်မရှိဘူး။ အရေးကြီးဒေတာချိန်မှာ MM တို့ STP တို့မှာဖြစ်တတ်တဲ့ အော်ဒါပေးမရတာမျိုးမဖြစ်နိုင်ဘူး။

အားနည်းချက်။ ။ အနည်းဆုံးဖွင့်ရမယ့် အော်ဒါဆိုဒ်ကန့်သတ်မှုရှိမယ်။ နည်းနည်းများမယ်။ ကော်မရှင်ရောများမယ်၊ Spread လည်းပေးရမယ်။ အနည်းဆုံး တင်ရမယ့် Deposit ပမာဏများနိုင်မယ်။ ECN မဟုတ်ဘဲ ECN လို့ပြောတဲ့ Broker တွေနဲ့လည်းတွေ့နိုင်မယ်။

(မှတ်ချက်၊ ။ ECN ဖြစ်ဖြစ်၊ MM, STP ဖြစ်ဖြစ် ဘယ်ဟာမျိုးနဲ့ပဲ Join Join ကိုယ်ဘက်က ပိုင်နိုင်ရင် ဖြစ်ပါတယ်။ ဒါကြောင့် MM တွေ၊ STP, ECN တွေကို ရွေးတာထက် ကိုယ့်ဘက်က အမြတ်ရအေင် Trade နိုင်မယ်ဆိုရင် စိတ်ချရမှာဖြစ်ကြောင်းပါ။)

ယခုတင်ပြချက်ဟာ Broker ရွေးချယ်ဖို့အတွက် လမ်းညွှန်ချက်မဟုတ်ပါ။ Broker ရွေးချယ်နိုင်လောက်အောင်လည်း ပြည့်စုံတဲ့ အချက်အလက်၊ သုံးသပ်ချက်များလည်း ပါဝင်ခြင်းမရှိတဲ့ အတွက် ဗဟုသုတအဖြစ်သာ ဖတ်ရှု့ကြဖို့ တိုက်တွန်းရင်း နိဂုံးချုပ်ပါတယ်။

Post အားလုံးဖတ်ရန်

ဒီ Blog မှာ တင်သမျှ Post အားလုံး စုစည်းမှု